والدة السد العالى : ابنى قلبه ابيض و لكنه عنيد و نفسى باله يرتاح
فى بداية الشهر الكريم شهر رمضان المعظم كان لابد ان يكون لنا السبق بصفتنا موقع السد العالى الرسمى لنسلط الضوء على احد اهم الشخصيات فى حياة الحضرى و التى لها تاثير كبير على السد العالى لما لها من منزلة و مكانة لا يضاهيها فيها احد. فهى البعيدة القريبة الى القلب و الروح و هى التى ان سكنت فى كفر البطيخ لا تفارق السد العالى دوما و لا يفارقها دوما. و لذلك كان لنا هذا الحوار الفريد مع والدة السد العالى .

- احكى لنا عن عصام الحضرى الطفل الصغير.

(اجابت ضاحكة) كان شقى اوى و مغلبنى و كل الى يهمه فى الدنيا انه يلعب كورة. و كان مغلبنى انا و ابوه. و لكن هو على طول طيب و حنين و الى فى ايده مش له.

كيف كان و هو طفل و شاب فى كفر البطيخ بيتعامل معكى و مع والده الحاج كمال الله يرحمه؟

(تجيب بحزن) الله يرحمه – عصام كل ما يكبر بيدى شبه على صورة ابوه اكتر. كان ابوه بيزعل منه من لعب الكورة و كان نفسه يركز فى دروسه اكتر. بس عصام كان ما يقدرش يبعد عن الكورة. كان طول عمره شاطر و مكافح و لا يقول لأ على حاجة. بس عنيد و الى فى دماغه لازم ينفذه بس كان يسمع النصيحة و اهم حاجة فى حياته التمرين.
و كنت دايما اقول له اوعى تزعل ابوك. و انا و ابوه كنا دايما خايفين عليه. بس كان دايما بياخد رأى ابوه و بيحكى له مشاكله.

- ايه فرق عصام الحضرى الطفل عن الشاب فى كفر البطيخ عنه الآن؟

هو زى ما هو ما اتغيرش فيه حاجة غير انه اصبح عصبى عن اول لأنه استحمل كتير و تعب لحد ما وصل للى هو فيه انهارده.

- يعنى هو بطبيعنه عصبى؟

من الى شافه من افعال الناس و تغيرهم عليه. و لكن فى الأصل هو هادى و طيب و قلبه ابيض زى الحليب.

- ازاى بياخد قراراته؟

من دماغه و ديه عين و صابته.

- بيتصل بيكى؟

على طول بيتكلم كل يوم يطمن عليا و على اخواته. و ودانى الحج انا و ابوه 3 مرات. و انا دايما بتابع اخباره من التليفزيون. و قبل كل ماتش يتصل بيا و يقول لى ادعيلى يا ماما و ادعى لزملائى قبل ما تدعيلى.

ايه بيكون شعورك لما بتشوفيه فى المباريات خاصة الى بيمثل فيها مصر؟

طبعا بكون فرحانة بيه و خاصة لما بيلعب للمنتخب بكون فخورة بيه لما بيكون سبب فى الفوز و كل مصر بتكون بتدعي له. و دايما بدعى له ان ربنا يحبب فيه خلقه و الحصى الى بيمشى عليه.

- عصام لف كتير من الأهلى لسيون للإسماعيلى للزمالك و اخيرا المريخ و دلوقت بيفكر يتنقل مرة اخرى ايه رأيك فى تحركاته ديه؟

انا زعلت اوى لما ساب الأهلى و كنت خايفة عليه و مكنتش عايزاه يسيبه . و نفسى يكمل الى فاضل له فى الملاعب فى نادى يرتاح فيه. فى السودان الناس بتحبه و طيبين. انا بصراحة على طول قلقانة عليه انه بيروح اندية كتير.لكن هو ادرى بمصلحته.

نفسك ياسين ابنه يطلع حارس مرمى جامد زيه؟

(ضاحكة) لأ احنا تعبنا اوى من الكورة. نفسى ياسين يطلع حاجة تانية غير لعيب كورة.

ايه دعوتك و نصيحتك ليه و احنا فى شهر رمضان الكريم؟

بدعى ان ربنا ينصره و يكرمه و يحبب فيه خلقه و الحصى الى بيمشى عليه. و انه يديه راحة البال و الهداية من عنده. و بنصحه انه يخفف عصبيته شوية و يحب الى بيحبه.



(2/8/2011  13:19)
 
 
الاسم
الفئة العمرية
الدولة
التعليق
 

 
 

الدعم الفني | اتصل بنا
الصفحة الرئيسية | الاخبار | الحوارات و الموضوعات | البوم الصور | الفيديو | البطولات | الأصدقاء | السيرة الذاتية